ನಿನ್ನ ಹತ್ತಿರ ನಾನು ಬರುವುದನು ಬಿಡಬಹುದು

ನೀನು ಹೇಳಿದ ಹಾಗೇ ಎಂದೆಂದಿಗು

ಆದರೆ ಅದು ಹೇಗೆ ತಡೆಯಬಹುದು ಹೇಳು

ನನ್ನ ಮನಸು ನಿನ್ನ ಕಡೆ ಬರದ ಹಾಗೆ

 

ನೀನು ಕೂಡ ನನ್ನ ಕಣ್ಣೆತ್ತಿ ನೋಡದೆಯೆ

ಇರಬಹುದು ಕೊಟ್ಟಿರುವ ಮಾತಿನಂತೆ

ಆದರೆ ಅದು ಹೇಗೆ ತಡೆಯುವೆಯೊ ಗೊತ್ತಿಲ್ಲ

ನನ್ನ ಬಿಂಬವು ಕಣ್ಣೊಳಗೆ ನುಗ್ಗಿಬರುವುದ

 

ಮನೆಗೆ ಹಾಕಿದ ಹಾಗೆ ಹಾಕಬಹುದೇ ಹೇಳು

ಕದಮುಚ್ಚಿ ಬೀಗವನು ಮನಸುಗಳಿಗೆ

ನೆನಪು ಬಾರದ ಹಾಗೆ ಕನಸು ಬೀಳದ ಹಾಗೆ

ಕಟ್ಟಿಹಾಕಲು ಬಹುದೆ ಅವುಗಳನ್ನು

ಏನೆಲ್ಲ ಒಪ್ಪಂದ ಮಾಡಿಕೊಳ್ಳಲು ಬಹುದು

ಅದರಂತೆ ನಾವುಗಳು ನಡೆಯಬಹುದು

ನಮ್ಮ ಮನಸ್ಸು ಹೃದಯಗಳು ನಮ್ಮ ಆಳುಗಳಲ್ಲ

ಅವು ನಮ್ಮ ಮಾತುಗಳ ಕೇಳುವುದೂ ಇಲ್ಲ

ಈ ಸತ್ಯ ಅರಿಯುವುದು ಒಳಿತಲ್ಲವೆ?

****

ರಾಜೇಂದ್ರ ಬುರಡಿಕಟ್ಟಿ